ប្រែសម្រួល៖ ស-សម្បត្តិ

ប្រធានាធិបតីអ៊ុយក្រែន វ៉្លូឌីមៀរ សេឡេនស្គី បានថ្លែងថា ជនជាតិចិនពីរនាក់ដែលប្រយុទ្ធនៅក្នុងកងទ័ពរុស្ស៊ីត្រូវបានចាប់ខ្លួនជាឈ្លើយសឹកនៅភាគខាងកើតអ៊ុយក្រែន។

លោក សេឡេនស្គី បានថ្លែងកាលពីថ្ងៃអង្គារថា កងកម្លាំងអ៊ុយក្រែនដែលប្រយុទ្ធនៅក្នុងតំបន់ដូនេតស្ក៍ បានទទួលឯកសារ កាតធនាគារ និងទិន្នន័យផ្ទាល់ខ្លួនរបស់ជនជាតិចិនទាំងនោះ។

“យើងមានព័ត៌មានថា មានជនជាតិចិនច្រើននាក់ទៀតនៅក្នុងអង្គភាពកងទ័ពកាន់កាប់ មិនមែនត្រឹមតែពីរនាក់នេះទេ។ យើងកំពុងស្វែងរកការពិតទាំងអស់” ហ្សេឡេនស្គីបានថ្លែងក្នុងសារមួយនៅលើ Telegram។ “ខ្ញុំបានណែនាំរដ្ឋមន្ត្រីការបរទេសអ៊ុយក្រែនឱ្យទាក់ទងជាមួយរដ្ឋាភិបាលប៉េកាំងភ្លាមៗ និងស្វែងយល់ពីរបៀបដែលប្រទេសចិននឹងឆ្លើយតបចំពោះបញ្ហានេះ។”

“យើងមានព័ត៌មានថា មានជនជាតិចិនច្រើននាក់ទៀតនៅក្នុងអង្គភាពកងទ័ពកាន់កាប់ មិនមែនត្រឹមតែពីរនាក់នេះទេ។ ពេលនេះយើងកំពុងស្វែងរកការពិតទាំងអស់” លោក សេឡេនស្គី បានថ្លែងនៅក្នុងសារមួយលើកម្មវិធី Telegram។ “ខ្ញុំបានណែនាំរដ្ឋមន្ត្រីការបរទេសអ៊ុយក្រែនឱ្យទាក់ទងប៉េកាំងភ្លាមៗ និងរកឱ្យដឹងថាតើប្រទេសចិននឹងឆ្លើយតបយ៉ាងដូចម្តេចចំពោះបញ្ហានេះ។”

“ការពាក់ព័ន្ធរបស់រុស្ស៊ីដែលទាក់ទាញចិនចូលក្នុងសង្គ្រាមនេះនៅអឺរ៉ុប ទោះដោយផ្ទាល់ឬដោយប្រយោលក៏ដោយ គឺជាសញ្ញាច្បាស់ថា ពូទីន នឹងធ្វើអ្វីគ្រប់យ៉ាងលើកលែងតែបញ្ចប់សង្គ្រាម។ គាត់កំពុងស្វែងរកវិធីដើម្បីបន្តការប្រយុទ្ធ” លោក សេឡេនស្គី បានថ្លែង។

វាមិនច្បាស់ទេថាតើជនជាតិចិនដែលអ៊ុយក្រែននិយាយថាបានចាប់ខ្លួនគឺជាទាហានចិន ឬអ្នកស្ម័គ្រចិត្ត។ មន្ត្រីលោកខាងលិចកាលពីថ្ងៃអង្គារបានប្រាប់ CNN ថា ពួកគេមិនឃើញ “ភស្តុតាងនៃការឧបត្ថម្ភពីរដ្ឋ” នៅក្នុងករណីរបស់ពួកគេទេ។

ប្រធានាធិបតីអ៊ុយក្រែនក៏បានអំពាវនាវដល់សម្ព័ន្ធមិត្តរបស់ខ្លួននៅសហរដ្ឋអាមេរិក និងអឺរ៉ុបឱ្យតវ៉ាផងដែរ។

រដ្ឋមន្ត្រីការបរទេសអ៊ុយក្រែន អាន់ឌ្រី ស៊ីប៊ីហា បានថ្លែងកាលពីថ្ងៃអង្គារថា ក្រុងគីវបានកោះហៅម្ចាស់កិត្តិយសប៉េកាំងនៅអ៊ុយក្រែន “ដើម្បីថ្កោលទោសអំពើនេះ និងទាមទារការពន្យល់”។

“យើងសង្ឃឹមថា បន្ទាប់ពីស្ថានភាពនេះ ជនជាតិអាមេរិកនឹងនិយាយកាន់តែច្រើនជាមួយជនជាតិអ៊ុយក្រែន ហើយបន្ទាប់មកជាមួយជនជាតិរុស្ស៊ី។ ហើយយើងសង្ឃឹមថា ភាគីចិនក៏នឹងឆ្លើយតបផងដែរ” លោក សេឡេនស្គី បានថ្លែងកាលពីរសៀលថ្ងៃអង្គារអំឡុងពេលសន្និសីទកាសែត។

“នេះគឺជាប្រទេសមួយទៀតដែលគាំទ្រយោធាដល់ការឈ្លានពានអ៊ុយក្រែនរបស់រុស្ស៊ីនៅខាងរុស្ស៊ី។ នេះជាប្រទេសមួយទៀតបន្ទាប់ពីអ៊ីរ៉ង់ និងកងទ័ពកូរ៉េខាងជើង” គាត់បានបន្ថែម។

CNN បានទាក់ទងក្រសួងការបរទេសចិន និងក្រសួងការពារជាតិរុស្ស៊ី ដើម្បីសុំមតិយោបល់។

ក្រសួងការបរទេសចិនបាននិយាយនៅក្នុងការបង្ហោះលើបណ្តាញសង្គមកាលពីខែមករា ឆ្នាំ២០២៤ ថា ពលរដ្ឋរបស់ខ្លួនគួរនៅឆ្ងាយពីតំបន់ជម្លោះ ដោយជំរុញឱ្យពួកគេ “ជៀសវាងការពាក់ព័ន្ធក្នុងជម្លោះក្នុងទម្រង់ណាមួយ — ជាពិសេសគួរចៀសវាងការចូលរួមក្នុងសកម្មភាពយោធារបស់ភាគីណាមួយ។”

ចិនបានជួយរុស្ស៊ីបង្កើនមូលដ្ឋានឧស្សាហកម្មការពាររបស់ខ្លួននៅពេលដែលពួកគេបន្តសង្គ្រាមប្រឆាំងនឹងអ៊ុយក្រែន នេះបើតាមមន្ត្រីជាន់ខ្ពស់របស់រដ្ឋបាលប៊ីដេនប្រាប់ CNN កាលពីឆ្នាំមុន។

ការគាំទ្រដែលចិនបានផ្តល់រួមមានម៉ាស៊ីនឧបករណ៍ជាបរិមាណច្រើន ម៉ាស៊ីនបង្ហោះដ្រូន និងម៉ាស៊ីនតឺប៊ូជែត និងបច្ចេកវិទ្យាសម្រាប់គ្រាប់បែកមីស៊ីល មីក្រូអេឡិចត្រូនិក និងនីត្រូសែល្យុឡូស ដែលរុស្ស៊ីប្រើប្រាស់ដើម្បីផលិតចំហេះសម្រាប់អាវុធ តាមមន្ត្រីបាននិយាយកាលពីខែមេសា ឆ្នាំ២០២៤។

ក្នុងពេលជាមួយគ្នា រុស្ស៊ីក៏បានពង្រឹងទំនាក់ទំនងយោធារបស់ខ្លួនជាមួយកូរ៉េខាងជើងយ៉ាងខ្លាំងកាលពីឆ្នាំមុន ដោយទាំងពីរបានចុះហត្ថលេខាលើកិច្ចព្រមព្រៀងការពារជាតិទៅវិញទៅមក ហើយព្យុងយ៉ាងបានបញ្ជូនកងទ័ពរបស់ខ្លួនទៅប្រយុទ្ធឱ្យម៉ូស្គូក្នុងការឈ្លានពានអ៊ុយក្រែន។

កាលពីខែមករា កងកម្លាំងអ៊ុយក្រែនដែលប្រតិបត្តិការនៅតំបន់ខួសក៍នៃប្រទេសរុស្ស៊ី បានចាប់ខ្លួនទាហានកូរ៉េខាងជើងពីរនាក់។

• រុស្ស៊ីកំពុងទាមទារយកផ្ទៃដីនៅតំបន់ខួសក៍

ការវាយប្រហាររបស់រុស្ស៊ីលើអ៊ុយក្រែនក្នុងរយៈពេល២៤ម៉ោងចុងក្រោយ បានសម្លាប់មនុស្សយ៉ាងតិចបីនាក់ និងរបួស១៩នាក់ផ្សេងទៀត តាមមន្ត្រីអ៊ុយក្រែន។ រុស្ស៊ីបានធ្វើការវាយប្រហារលើតំបន់ដនីប្រូប៉េត្រូវស្ក៍ ដូនេតស្ក៍ ខាកូវ និងខេសុនរបស់អ៊ុយក្រែន តាមការនិយាយរបស់មន្ត្រីមូលដ្ឋាន។

នៅតាមបណ្តាខ្សែប្រយុទ្ធផ្សេងទៀត ក្រសួងការពារជាតិរុស្ស៊ីបាននិយាយកាលពីថ្ងៃអង្គារថា ពួកគេបានយកត្រឡប់មកវិញនូវភូមិចុងក្រោយមួយដែលកាន់កាប់ដោយអ៊ុយក្រែននៅតំបន់ខួសក៍ រាប់ខែបន្ទាប់ពីគីវបានចាប់ផ្តើមវាយប្រហារឆ្លងព្រំដែនដោយភ្ញាក់ផ្អើល។

“កងកម្លាំងប្រដាប់អាវុធនៃសហព័ន្ធរុស្ស៊ីបន្តវាយបំបាក់កងកម្លាំងប្រដាប់អាវុធអ៊ុយក្រែននៅតំបន់ខួសក៍។ កងកម្លាំងក្រុមខាងជើងបានរំដោះភូមីហ្គូយេវ៉ូនៅក្នុងតំបន់ខួសក៍អំឡុងពេលប្រតិបត្តិការវាយប្រហារ” ក្រសួងការពារជាតិរុស្ស៊ីបាននិយាយនៅក្នុងសេចក្តីថ្លែងការណ៍មួយ។

វិទ្យាស្ថានសិក្សាសង្គ្រាម (ISW) ដែលជាអង្គភាពតាមដានជម្លោះមានមូលដ្ឋាននៅសហរដ្ឋអាមេរិក បាននិយាយនៅក្នុងការធ្វើបច្ចុប្បន្នភាពកាលពីថ្ងៃចន្ទថា កងកម្លាំងរុស្ស៊ីបានឈានជើងយ៉ាងខ្លាំងនៅខួសក៍។ ផែនទីនៃការចូលលុករបស់ ISW បង្ហាញថា កងទ័ពអ៊ុយក្រែននៅតែមាននៅតាមតំបន់តូចៗនៃតំបន់រុស្ស៊ី។

កងទ័ពអ៊ុយក្រែនបានកាន់កាប់ផ្នែកមួយនៃតំបន់ខួសក៍តាំងពីខែសីហា ឆ្នាំ២០២៤ ទោះបីជាកងកម្លាំងរុស្ស៊ីបានយកទឹកដីភាគច្រើនត្រឡប់មកវិញតាំងពីពេលនោះមក។

ក្នុងពេលដំណាលគ្នា កងពលអ៊ុយក្រែនបានចេញផ្សាយវីដេអូកាលពីថ្ងៃអង្គារបង្ហាញពីការវាយប្រហារទៅលើតំបន់បែលហ្គូរ៉ូដដែលជាប់ព្រំដែនរុស្ស៊ី មួយថ្ងៃបន្ទាប់ពីលោក សេឡេនស្គី បានបញ្ជាក់ជាលើកដំបូងកាលពីថ្ងៃចន្ទថា កងទ័ពរបស់ប្រទេសគាត់បានសកម្មនៅក្នុងតំបន់នោះ ខណៈពួកគេព្យាយាមការពារទីក្រុងអ៊ុយក្រែននៅជិតព្រំដែន។

កងពលទី225 របស់អ៊ុយក្រែនបាននិយាយថា វីដេអូនោះបង្ហាញពីកងកម្លាំងរបស់ខ្លួនបំផ្លាញស្ពានពីរនៅបែលហ្គូរ៉ូដ នៅភូមិហ្គ្រាហ្វូកា និងណាដេហ្សេវកា។ CNN បានផ្ទៀងផ្ទាត់ថា ទាំងនោះគឺជាទីតាំងដែលបង្ហាញនៅក្នុងវីដេអូ។

“បន្ទាប់មកប្រតិបត្តិការដ្រូន និងការសម្អាតផ្ទៃដីបានតាមមក” កងពលបាននិយាយនៅក្នុងការបង្ហោះលើ Telegram ដោយបញ្ជាក់ពីវត្តមានរបស់ពួកគេនៅលើដីរុស្ស៊ី។

កងកម្លាំងអ៊ុយក្រែនបានចាប់ផ្តើមការវាយប្រហារកម្រិតមានកំណត់នៅតំបន់ពាយព្យបែលហ្គូរ៉ូដរបស់រុស្ស៊ីកាលពីថ្ងៃទី១៨ ខែមីនា តាម ISW នៅតំបន់ដែលស្ថិតនៅជាប់ព្រំដែនពីអ៊ុយក្រែន។ ក្រសួងការពារជាតិរុស្ស៊ីកាលពីមុនបាននិយាយថា ពួកគេបានវាយបំបាក់កងទ័ពអ៊ុយក្រែនដែលវាយប្រហារបែលហ្គូរ៉ូដ៕